IL RACCONTO / LA ZZINGARA E LU SCIUCATORE TI CARTE

| 1 Gennaio 2021 | 0 Comments

di Vincenzo Mariano______

Era lui! Lu sciucatore ti carte cchiù spiertu e cchiù furtunatu.
La calabrese, il poker, il macao e puru la zzacchinetta.
Novoli, Nardò, Lecce, Porto Cesareo, Campi, Copertino erano tutte piazze che frequentava e dove, spesso, veniva invitato per il solo piacere di vederlo con le carte in mano e con la speranza di batterlo almeno una volta.

 

Ddra matina no si ricurdà mancu quanti sordi ia inti la sera prima e trasiu, schirzannu cu lu sòlitu amicu, intra a lu sòlitu barra.
– Due caffè.

La signora ti lu barra, ca stia ti spalle, riconobbe la voce e, rivolta a na zzingara ca, ssittata a nu taulinu scusu a retu retu, si sta ssuppà na pastaburra intra a na cuppiteddra ti latte e cafè, paru cu do piccini piccicchi, piccicchi, tisse:
– Nah, nah, lièggine la manu a lu giovanotto. Quiddru ti lu tae qualche sordu ti carta.

Lu sciucatore no ia mai critutu a sti sciucarieddri, farnarieddri, né a mmaciarie, né a rattamienti o a parimenti vari e, tantumenu a la lettura ti la manu, ma cu ni rricala qualche mille lire, si bbicinau alla zzingara e mise la mano in posizione di lettura.
– Io leggere mano, tu diecimila lire!

Lu Osvaldu, quistu era lu nome del grande giocatore, tirau a retu la manu.
– Ma ce sta dici? Tecemila lire? No, no, lassamu perdere.

Lu Osvaldu pajau li cafè e  la signora ti lu barra nsistiu.
– Mena, Osvà, tanne na cosa  a ddra pora spinturata. Sirai ca tene cinque fili.

Lu Osvaldu, allora, turnau alla zzingara che, a lu frattiempu, s’ia misu nu saccu a n’cueddru e cu n’auru a manu, si ni sta scia cu li to vagnuni ca s’ianu zzicati allu stianu.
Osvaldo si mise tra lei e la porta e cacciau cinquemila lire.
La zingara si li sta pigghià…
– Devi leggermi la mano…
– Noo, leggere mano diecimila lire!
Lu Osvaldu, fece il gesto cònsono per l’occasione, mise le cinquemila lire in tasca e guadagnò l’uscita un po infastidito.

 

Per la sera, Osvaldo, era nvitatu a Lecce pi na partita ti telesina variata. Lu sciuecu a do no lu futtia cieddri.
La casa era ti grande importanza. Li nvitati, tutti cchiù randi ti iddru, tutti importanti e conosciuti: avvocati, mietici, imprenditori e nobili. Tutti ca uardannu iddru e si parlannu a recchia.
Ncignau lu sciuecu e, pi lu Osvaldu, fuei na Caporettu!
Mai nu puntu cu ncocula. Mai na carta cu trase e, ci trasia, pirdia. Nu disastru!
Serata da dimenticare.

 

Fu così per tante, tante serate a seguire. A do scia e a do si mintia, pirdia a qualsiasi sciuecu facia!
Quannu pirdia, pinsà sempre a ddra zzingara.
Tantu ca na espira, oramai, convintu ca tutte ddri perdenze dipendianu ti eddra, decise cu la ba troa.

 

Pi precauzione, lassau tutti li sordi a casa e si tenne a m’posciu sulamente trentacinquemila lire e qualche  sordu minutu.

 

Li zzingari stianu accampati a retu castieddru e iddru rriau cu la machina “alfa romeo”.
Si uardau ti nanzi e di retu, leggermente preoccupatu perché si ricurdau quannu ti vagnone facìa lu tisculu e mammasa ni ticia ca lu tia alli zzingari e si bicinau a unu ca stia ssittatu a lu scalone ti na roulotte ca cu nu curtieddru sta scurtiscià nu bastone ca tinia a manu.
Senza mancu cu brape occa, né cu bazza la capu, lu zzingaru ni fece segnu a n’aura roulotte.
Sciu, e, senza cu tuzza, la zzingara ti lu barra apriu.

Paria mutu megghiu ti quannu la edde allu barra: capiddri sistimati a tuppu, maglietta stretta e generosa, uecchi e mili luccicanti e luciti.
Lu fece trasire e lu fece ssittare.
Pigghiau nu fazzulettu e lu stese sobbra na taula tra iddru e eddra.
Intra a tuttu stu ccunzare, la zzingara, mintia in mostra lu sua balcone invitante e provocante.

Lu Osvaldu rrussicacchiau e a m’posciu strense li pugni e ncignau cu si preoccupa.
“Tici ca mi ccitinu o mi nquacìnanu ti mazzate?” pinsau intra a iddru e li scinocchie ncignara a trimulare pi cuntu loru.
Sempre cu lu piettu a mostra, la zzingara, pigghiau n’ueu, lu mese al centro ti lu fazzulettu e ni tisse:
– Mettere tutti soldi che tieni qui.
E fece segnu ti coste a l’ueu.

Iddru pigghiau intimila lire e li mpuggiau sobbra a l’ueu.
– Ho detto tutti quelli che tieni!
Allora, lu Osvaldu, pigghiau tutti li sordi ca n’ianu rrumasti, puru li minuti e li mese intra lu fazzulettu.
Eddra cutulau la capu come per dire ca eranu picchi, poi, ncucchiau li quattru pizzure ti lu fazzulettu, fece nu nnutu, si azzau, fece na specie ti giru, si lu mese a m’piettu e si ginucchiau cu la capu chicata. Si azzau, cacciau lu fazzulettu cu l’ueu e cu li sordi, lu mpuggiau a n’terra e ni tisse a lu Osvaldu cu lu scrafazza cu lu pete.

Lu Osvaldu, ca no bitia l’ora cu spiccia mprima tutta la farsa, lu scrafazzau.
Eddra lu pigghiau e lu mpuggiau sobbra la taula.
Cu li manu fece na specie ti cruci e girotondi cu li tecite. Si fermò e gli disse di guardare nel fazzoletto.
Quannu eddra apriu lu fazzulettu cu do pizzure a na manu e doi all’aura, a lu Osvaldu nn’ia inutu tristu.
Intra a lu fazzulettu li sordi no nc’eranu cchiui. Però, ia istu nu ticitu cu l’ogna neura e na specie ti uecchiu ti cristianu, ca cu lu mmiscamientu ti lu russu e di li scorze ti l’ueu, paria tuttu na cosa ti paura e di fuemmicu. Lu Osvaldu si trattenne.

 

La zzingara pigghiau lu fazzulettu cu tuttu lu intra e lu jticau ti lu farcunceddru. Si ssittau ti fronte all’Osvaldu, sempre cu li stessi uecchi, cu li stessi mili e cu li stesse menne e capiddri e ni zziccau li manu.
Lu Osvaldu, a stu puntu, sta trimulà comu na canna.

– Tu avere persona che vuole male a te. Lui va chiesa tutti giorni e, seduto ultima sedia, non parla con Signore, ma con dimonio per fare male a te.
Adesso io aiutare te.

Ni pigghiau la capu e si la mese a m’piettu. Tisse qualche parola a lingua scanusciuta e lu baciau a li capiddri.
Ti intra nu tiraturu pigghiau na specie ti simienti a lui scanusciuti, li nturtignau intra na ficurina sape ti ccene e ni li tese.
– Quando tu giocare stasera, toccare questi e pensare a me. Tu vincere sicuro.

Lu Osvaldu no fece mancu li tre scaluni. Zzumpau, direttamente, sobbra la strata, mese a motu la machina e turnau a casa, ncora cu la ndore ti ueu intra lu nasu, ma no sapia ci era ti l’ueu o ti lu piettu ti la zzingara.

 

La sera sciu cu scioca, ma ugualemente. Tuccà li simienti e nienti. Na sera comu a l’aura finu a quannu, scunfurtatu, turnau a casa, jaticau li simienti intra lu cessu, si tirau to scarafuni sulu e si sciù curcau.

 

La sera topu, si istiu a nueu e si ni sciu a lu cinema: “Nick mano fredda” con Paul Newman.
Per una intera settimana non toccò più carte, mancu pi nu solitariu, ca mancu quiddru ni issia.

 

Passata na simana bona, accettò l’invito in quella casa altolocata e fu, per lui, na splendida serata. No sapia cchiui a quale posciu si era mentre li sordi.
Continuò a giocare e a vincere fino a quando na sera seduto ad un tavolo borghese, inciu tantu ca, alla fine, tutti ni eranu dare sordi e, ca, poi, cieddri ni tese cchiui.
Turnannu a casa, all’amicu ca si purtà sempre cu iddru, tisse: “aggiu spicciatu ti sciucare a carte”.
L’amicu espresse qualche dubbio, ma, lu Osvaldu, mantenne la parola e no sciucau cchiui.

 

Ncora moi gli viene riconosciuta la sua “arte” e, ogni tanto, c’è sempre qualche nuovo giocatore che gli chiede di raccontare di un piatto di telesina o di un banco di baccarà rimasto famoso quando, servendo un tre a destra e un quattro a manca, senza manco riflettere, diede tre toc toc toc con l’indice sulle sue carte e vinse il colpo.
La decisione di non prendere carta con il suo cinque, gli fece vincere tutti i colpi a seguire.
Iddru, allora, còtula la capu, face na smorfia ti sorrisu senza cu mmoscia li tienti, si commuove, e lu pinsieri sua ula alla zzingara. Zzingara della quale no si scerra mai e ca tutte li nuetti, ncora, si la sonna! ______

 

CREDITS: nella foto di copertina, Caravaggio, “Buona ventura”, olio su tela, 1594, Pinacoteca Capitolina, Roma.

______

Vincenzo Mariano, 72 anni, di Copertino, appassionato di teatro, musica e “come se non bastasse, ho coltivato, educatamente, tutti i vizi possibili.”.

Ha cominciato a scrivere in vernacolo nel 1975 e ha diretto i giornali satirici  “La Macennula”, “Lu Ncannulaturu”, “La Cumeta”.

Nei suoi racconti, “un invito a non cercare lontano e con affanno, la felicità. Perché riflettendo bene, potremmo accorgerci che la teniamo vicinissima e, magari, dentro noi stessi”.

 

 

Category: Costume e società, Cultura

About the Author ()

Lascia un commento

Il tuo indirizzo email non sarà pubblicato. I campi obbligatori sono contrassegnati *

Connect with Facebook

Questo sito usa Akismet per ridurre lo spam. Scopri come i tuoi dati vengono elaborati.